«Атырау–Доссор» автомобиль жолын төрт жолаққа дейін кеңейту жоспарланып отыр. Әңгіме жалпы ұзындығы 86 шақырым болатын учаске туралы, оның ішінде қазіргі таңда өңірдегі ең жүктемесі жоғары жолдардың бірі саналатын Қарабатан кентіне дейінгі бөлік те бар, деп хабарлайды Atyrau Today тілшісі.
Аталған жол учаскесі 2009 жылы III техникалық санат талаптарына сәйкес қайта жаңғыртылған. Алайда сол кезеңде трассаның Атырау облысы үшін стратегиялық маңызы мен транзиттік қозғалыстағы рөлі толық ескерілмеген. Соңғы жылдары көлік қозғалысының, оның ішінде жүк көліктерінің саны айтарлықтай артты.
Көлік жүктемесін ескере отырып және «Қуатты өңірлер – ел дамуының драйвері» ұлттық жобасы аясында 2023 жылы трассаны I техникалық санатқа келтіру бойынша жобалық-сметалық құжаттаманы әзірлеу жұмыстары басталды. Бұл жолдың жүру бөлігін төрт жолаққа дейін кеңейтуді көздейді.
Жолды қайта жаңғырту жұмыстары 2026 жылдың екінші жартысында басталады деп жоспарланған. Жобаны іске асыру Атырау облысының кешенді даму жоспарына енгізілген.
«Атырау–Доссор» трассасы маңызды транзиттік маңызға ие және автокөліктер Ресей Федерациясы бағытына қатынайтын халықаралық көлік дәлізінің бір бөлігі болып табылады. Сонымен қатар жол бойында ірі өнеркәсіптік кәсіпорындар орналасқан, бұл көлік қозғалысының жоғары қарқындылығын қамтамасыз етеді.
Жолдың тарлығы жол-көлік оқиғаларының жиілеуінің негізгі себептерінің бірі болып отыр. Мәселен, 2024 жылы аталған учаскеде 43 жол-көлік оқиғасы тіркеліп, салдарынан 24 адам қаза тапқан. Ал биылғы жылдың басынан бері тағы 2 жол-көлік оқиғасы орын алған. Жүргізушілер мен өңір тұрғындары жолды кеңейту қажеттігін көптен бері көтеріп келеді.
Фото: иллюстратив
