Атырау қаласында «жедел жәрдем» бригадасы клиникалық өлім жағдайындағы науқасты аман алып қалды, деп хабарлайды AtyrauTODAY тілшісі.
2026 жылғы 6 ақпанда сағат 05:33-те 45 жастағы ер адамға жедел көмек көрсету туралы шақырту түсті. Жедел жәрдем бригадасы оқиға орнына сағат 05:43-те жетті.
Қысқаша визуалды тексеру кезінде науқас ес-түссіз болды, тынысы жиілеген әрі үзік-үзік (гаспинг), ұйқы артериясынан пульс анықталмады. Толық тексеру барысында көз қарашықтары кеңейгені байқалды, фонендоскоп арқылы жүрек аускультациясы асистолияны көрсетті. Мониторинг те жүрек қызметінің жоқ екенін растады.
Бригада дереу реанимациялық шараларды — жүрек-өкпе реанимациясын (ЖӨР) бастады. Манипуляциялар үзіліссіз жүргізіліп, Атырау кардиологиялық орталығының қабылдау бөлімінде де жалғастырылды. Медицина қызметкерлерінің жедел әрі үйлесімді жұмысының арқасында науқастың өмірі сақталып қалды.
Реанимациялық көмекті көрсеткен бригада:
• Фельдшерлер: Мендыгалиев Сұлтан, Қонысова Жұлдыз
• Жүргізуші: Амандыков Асылан
Жедел жәрдем қызметкерлерінің кәсібилігі мен шұғыл әрекеттері тағы бір адамның өмірін сақтап қалуға мүмкіндік берді.
