Атырау қаласының №2 соты денсаулыққа қасақана жеңіл зиян келтіру дерегі бойынша екі әйелге қатысты қылмыстық істі қарады, деп хабарлайды AtyrauTODAY тілшісі.
Оқиға 2025 жылғы 3 қазанда болған. Әйелдер арасында көрсетілмеген туристік қызметке байланысты жанжал туындаған. Жанжал барысында айыпталушы А. және оның танысы С. жәбірленушіге — блогерге — күш қолданған. Сараптама қорытындысы бойынша келтірілген жарақаттар денсаулыққа жеңіл зиян ретінде бағаланған.
Прокурор әрқайсысына 1 жыл бас бостандығынан айыру жазасын тағайындап, оның орындалуын сол мерзімге кейінге қалдыруды сұрады. Жәбірленуші нақты мерзімге соттауды және келтірілген шығынды өтеуді талап етті.
Сот әйелдерді кінәлі деп таныды. Әрқайсысына 1 жыл бас бостандығынан айыру жазасы тағайындалып, жазаның орындалуы дәл сол мерзімге кейінге қалдырылды.
Сондай-ақ олардан:
▪️ 1 млн теңге — моральдық зиян
▪️ 2,9 млн теңге — материалдық шығын өндірілді.
Жеңілдететін мән-жай ретінде сотталушылардың кәмелетке толмаған балаларының болуы ескерілді.
Үкім заңды күшіне енген жоқ.
