Атыраудан шыққан Марина Малышева таудың жоқтығы үлкен мақсаттарға жетуге кедергі емес екенін дәлелдеді. Ол бар-жоғы 20 күн ішінде бірден екі шыңды — Эльбрус пен Демавендті бағындырып, «7 вулкан» халықаралық жобасының қатысушысы атанды, деп хабарлайды AtyrauTODAY тілшісі.
Марина Малышева 39 жаста. Ол Атырау қаласында дүниеге келіп, осында өскен. Күнделікті өмірде Марина — кәсіби фитнес-жаттықтырушы, жар және ана. Оның айтуынша, бүгінде әйелдер белсенді әрі экстремалды демалыс түрлерін жиі таңдай бастады. Мұндай бағыттар төзімділік пен күш-қайратты, батылдықты талап етеді. Марина үшін спорттық туризм мен альпинизм — жай ғана спорт емес, мінезді шыңдап, мүмкіндіктер көкжиегін кеңейтетін нағыз сын.
Қазіргі таңда Марина — тауы жоқ, жазық далада орналасқан Атырау қаласынан шыққан жалғыз альпинист. Соған қарамастан, ол әрбір шыңға жеке дайындық жоспарын жасап, жаттығуларын соған сай жүйелі түрде жүргізіп келеді.
«Қай жерде болсам да, туған қалым — Атырау мен Қазақстан туралы айтып жүремін. Бізде тау жоқ, тек шексіз көкжиек, жел, аптап ыстық және далаға тән қайсар мінез бар. Атырауда биіктікке бейімделетін орын жоқ, бірақ жаттығу үшін міндетті түрде тау қажет емес екенін түсіндім», — дейді Марина.
Экспедицияларға дайындық оған жыл бойы жалғасады. Дайындық барысында ол күштік жаттығуларды, аэробтық жүктемені, төзімділікке арналған жұмыстарды, сондай-ақ ауыр рюкзакпен немесе салмақты жилетпен ұзақ әрі бірқалыпты кардио жаттығуларды қамтиды. Күрделілігі мен қаржылық шығындарының көп болуына байланысты Марина жылына бір ғана шыңды бағындыруға мүмкіндік алады. Сондықтан әр экспедицияға тек жаттығу жоспарын ғана емес, еңбек демалысын да алдын ала жоспарлайды.
Марина Малышеваның тарихы — таудан алыс жерде өссе де, табандылық, тәртіп пен өзіне деген сенім арқылы биік белестерді бағындыруға болатынының жарқын дәлелі.
