Атыраулық бизнесменнің қолдауымен құрылған ArtLine Kazakhstan командасы Lamborghini Super Trofeo әлемдік чемпионатының сегізінші маусымын керемет нәтижемен аяқтады. Бірінші жарыстағы жеңістен кейін команда әлемдік финалда сенімді басымдыққа ие болып, екінші кезеңде Шота Абхазава мен Егор Оруджев жүлделі үштіктің қатарына еніп, табысты нәтижесін бекітті, деп хабарлайды AtyrauTODAY тілшісі.
Егор Оруджев жарысты үшінші орыннан бастап, қарсыластарымен қақтығыстардан сақтана отырып өз орнын сенімді ұстады. Ал Шота Абхазава шешуші сәтте қарсыласын басып озып, команданы екінші орынға жеткізді. Бұл нәтиже ArtLine Kazakhstan командасына әлемдік финалда жеңісті растауға және Lamborghini Super Trofeo 2025 бойынша әлем чемпиондары атағын иеленуге мүмкіндік берді.
Жарыстан кейінгі сұхбатында Шота Абхазава команда өздерінің басты мақсатына – Lamborghini Super Trofeo жарысының барлық санаттарында әлем чемпионы атануға қол жеткізгенін атап өтті. Қазір ArtLine Kazakhstan командасының қоржынында AM, PRO, Lamborghini Cup және PRO AM санаттарындағы чемпиондық атақтар бар.
Команданы, пилоттарды, механиктерді, менеджерлерді және жанкүйерлерді осы зор жетістікпен құттықтаймыз! Қазақстандық команда әлемдегі ең жылдам автоспорттық серияда өздерінің мықтылығын тағы да дәлелдеді.
