Атырау қаласының әкімшілік құқық бұзушылықтар жөніндегі мамандандырылған сотында Қазақстан Республикасының ӘҚБтКнің 440-1-бабының 1-бөлігі (есірткі, психотроптық заттарды, сол тектестерді, сондай-ақ күшті әсер ететін заттарды медициналық емес мақсатта тұтыну) және 434-бабының 2-бөлігі (ұсақ бұзақылық) бойынша құқық бұзушы К.-ға қатысты әкімшілік құқық бұзушылық туралы істер қаралды, деп хабарлайды AtyrauTODAY тілшісі.
Сотпен анықталғандай, 2026 жылғы 8 наурызда азамат К. Атырау қаласы, Азаттық даңғылында ұсталып, тексеру барысында оның медициналық емес мақсатта есірткі заттарын, атап айтқанда «PVP» (альфа пирролидинопентиофенон), «ТРМ» (метаболиты тропикамида) қолданғаны анықталған.
Сондай-ақ, К., әкімшілік жаза қолданылғаннан кейін бір жыл ішінде қайталап, Атырау облыстық ауруханасында былапыт сөйлеп, айналасындағыларға құрметсіздік көрсетіп, қоғамдық тәртіпті бұзған.
К.-нің әкімшілік құқық бұзушылық жасаудағы кінәсі әкімшілік құқық бұзушылық туралы хаттамалармен, сауал қою хаттамаларымен, медициналық куәландыру қорытындысымен және бейнежазбалармен толық дәлелденді.
Сот қаулысымен К. ӘҚБтК-нің 440-1-бабының 1-бөлігімен, 434-бабының 2-бөлігімен кінәлі деп танылып, жасалған құқық бұзушылықтың сипаты, құқық бұзушының жеке басы, құқық бұзушылық жасағанға дейінгі және одан кейінгі мінез-құлқы ескеріле отырып, оған әкімшілік жаза ретінде 30 тәулік мерзімге әкімшілік қамаққа алу жазасы қолданылды.
Сот қаулылары заңды күшіне енді.
Амандық САҒЫНТАЙҰЛЫ
Фото: ru.freepik.com
