Астрахань – Атырау – Ақтөбе тасжолында ерекше трайктермен жүрген шетелдік туристер көзге түсті, деп хабарлайды AtyrauTODAY тілшісі.
Атырау облысының Құрманғазы ауданында жергілікті тұрғындар ерекше үш дөңгелекті мотоциклдермен саяхаттап жүрген екі шетелдік туристі байқап қалды. Куәгерлердің айтуынша, олар Құрманғазы ауылы маңындағы Астрахань – Атырау – Ақтөбе халықаралық автожолы бойымен жүрген. Саяхатшылардың видеосы Instagram әлеуметтік желісінде жарияланып, көпшіліктің қызығушылығын тудырды.
Кадрлардағы көліктердің сыртқы келбетіне қарағанда, олар ұзақ қашықтыққа арналған премиум санатындағы туристік трайктер. Алдын ала болжам бойынша, бұл Harley-Davidson Tri Glide Ultra немесе соған ұқсас модельдер болуы мүмкін.
Түпнұсқа Harley-Davidson трайктері АҚШ-тың Пенсильвания штатындағы компания зауытында шығарылады. Сонымен қатар классикалық круизер мотоциклдерінің, соның ішінде Honda Gold Wing негізінде арнайы шеберханаларда құрастырылатын кастом үлгілері де бар.
Мұндай трайктердің басым бөлігі көлемі 1,8 литрден жоғары қуатты V-тәрізді бензин қозғалтқыштарымен жабдықталған. Олар жоғары октанды АИ-95 немесе АИ-98 маркалы жанармаймен жүреді. Салмағы шамамен 500 келі болғанына қарамастан, орташа жанармай шығыны 100 шақырымға 6–8 литрді құрайды.
Халықаралық тасжол бойымен ерекше көлікпен сапарлаған туристер жүргізушілер мен жергілікті тұрғындардың назарын аударды. Олардың қай елден келгені және сапар бағыты әзірге нақтыланбаған.
