Атырауда Ұлттық киімдер күніне арналған шеруге «Мен бармын» қоғамдық қорының жеті тәрбиеленушісі қатысты, деп хабарлайды AtyrauTODAY тілшісі.
Олар — жасы 18 бен 28 аралығындағы Даун синдромы бар жастар. Қор 16 жастан асқан даму ерекшеліктері бар адамдарды тәрбиелеумен және қолдаумен айналысады. Оларға өз әлеуетін ашуға және қоғам өміріне бейімделуге көмектеседі.
Қатысушылар үшін бұл шеру жарқын әрі есте қаларлық оқиға болды. Олар қала тұрғындарымен бірге сап түзеп өтіп, ұлттық киімдерді таныстырып, өздерін үлкен мерекенің бір бөлігі ретінде сезінді.
Қор өкілдерінің айтуынша, шығармашылық пен қалалық іс-шараларға қатысу арқылы олар тәрбиеленушілерін қоғамға бейімдеуді, өздерін сенімді сезінуіне және қоғамның толыққанды мүшесі болуына ықпал етуді мақсат етеді.
«Мен бармын» қоғамдық қоры Атыраудың мәдени өміріне үнемі қатысып, инклюзивті ортаны дамытуға және ерекше жандарды қолдауға өз үлесін қосып келеді.
