Атырау қаласынан үш айлық қыз бала ауыр туа біткен жүрек ақауымен санитарлық авиация арқылы Астана қаласындағы ДКХЦ АҚ Ұлттық ғылыми медициналық орталығына шұғыл түрде жеткізілді, деп хабарлайды AtyrauTODAY тілшісі.
Сәбиге өкпе веналарының аномальды дренажымен қатар жүретін күрделі туа біткен жүрек ақауы диагнозы қойылған. Ауруханаға түскен кезде баланың жағдайы өте ауыр болған — ол жасанды өкпе желдету аппаратына қосылған. Дәрігерлер өмірлік көрсеткіштер бойынша шұғыл операция жасау туралы шешім қабылдады.
Қысқа уақыт ішінде нәрестеге операция жасалды. Қазіргі таңда баланың жағдайы ауыр, бірақ тұрақты. Ол жансақтау бөлімінде ем қабылдауды жалғастыруда.
«Операция сәтті өтті. Баланың өмірлік маңызды қызметтерін қолдау үшін барлық қажетті шаралар толық көлемде көрсетілуде», — деді балалар кардиохирургі Бауыржан Туякбаев.
Әлия Жамитова
Фото: ru.freepik.com
